പ്രമേഹത്തിന് അധികമാരും ചര്‍ച്ചചെയ്യപ്പെടാത്ത ഒരു ലക്ഷണമുണ്ട്

പ്രമേഹ ലക്ഷണങ്ങളെക്കുറിച്ച് പറയുമ്പോള്‍ സാധാരണയായി പറയപ്പെടുന്ന ലക്ഷണങ്ങളാണ് ഇടയ്ക്കിടെയുള്ള മൂത്രമൊഴിക്കല്‍, അമിത ദാഹം, ശരീരഭാരം കുറയല്‍ എന്നിവയൊക്കെ. പക്ഷേ, അധികം ചര്‍ച്ച ചെയ്യപ്പെടാത്തതും എന്നാല്‍ പ്രധാനപ്പെട്ടതുമായ മറ്റൊരു ലക്ഷണം കൂടിയുണ്ട്. അത് ജനനേന്ദ്രിയത്തിലുണ്ടാകുന്ന ചൊറിച്ചിലാണ്. ഇത് പലപ്പോഴും യീസ്റ്റ് അണുബാധ മൂലമാണ് ഉണ്ടാകുന്നത്. ജനനേന്ദ്രിയത്തിലെ ചൊറിച്ചില്‍ പ്രത്യേകിച്ച് ടൈപ്പ് 2 പ്രമേഹത്തിന്റെ ഒരു മുന്‍കൂര്‍ സൂചനയായിരിക്കാം. കണ്‍സള്‍ട്ടന്റ് ഡയറ്റീഷ്യനും ഡയബറ്റിസ് എഡ്യൂക്കേറ്ററുമായ കനിക മല്‍ഹോത്രയാണ് ഇക്കാര്യത്തെക്കുറിച്ച് പറയുന്നത്.

പ്രമേഹവും ജനനേന്ദ്രിയത്തിലെ ചൊറിച്ചിലും തമ്മില്‍ എന്താണ് ബന്ധം

രക്തത്തിലെ ഉയര്‍ന്ന പഞ്ചസാരയുടെ അളവ് യീസ്റ്റ് (കാന്‍ഡിഡ) വളരാന്‍ അനുയോജ്യമായ അന്തരീക്ഷം സൃഷ്ടിക്കുന്നു. അതിനാല്‍, രക്തത്തിലും മൂത്രത്തിലും സ്രവങ്ങളിലും ഗ്ലൂക്കോസിന്റെ വര്‍ദ്ധനവ് ഉണ്ടാകുന്നു.

എങ്ങനെയാണ് ഇത് ജനനേന്ദ്രിയത്തിലേക്ക് വ്യാപിക്കുന്നത്

പ്രമേഹം രക്തത്തില്‍ അധിക പഞ്ചസാരയുടെ അളവ് ഉണ്ടാക്കുന്നു. ഇത് വിയര്‍പ്പ്, മൂത്രം, യോനി സ്രവങ്ങള്‍ തുടങ്ങിയ ശരീര സ്രവങ്ങളിലേക്കും വ്യാപിക്കുന്നു.

ദുര്‍ബലമായ രോഗപ്രതിരോധ സംവിധാനം: ഉയര്‍ന്ന ഗ്ലൂക്കോസിന്റെ അളവ് രോഗപ്രതിരോധ സംവിധാനത്തെ ദുര്‍ബലപ്പെടുത്തുന്നു. ഇത് ശരീരത്തിന് അണുബാധകളെ ചെറുക്കാന്‍ ബുദ്ധിമുട്ടാക്കുന്നു.ഈര്‍പ്പമുള്ള അന്തരീക്ഷം: ചൂടുള്ളതും ഈര്‍പ്പമുള്ളതുമായ ജനനേന്ദ്രിയഭാഗം യീസ്റ്റ് വളര്‍ച്ചയ്ക്ക് സാധ്യതയുള്ളതാണ്. കൂടാതെ അധിക ഗ്ലൂക്കോസ് അതിന്റെ അമിതവളര്‍ച്ചയെ കൂടുതല്‍ വര്‍ദ്ധിപ്പിക്കുകയും ചൊറിച്ചില്‍, അസ്വസ്ഥത എന്നിവയിലേക്ക് നയിക്കുകയും ചെയ്യുന്നു.

ലക്ഷണങ്ങള്‍

• ജനനേന്ദ്രിയത്തില്‍ തുടര്‍ച്ചയായ ചൊറിച്ചില്‍ അല്ലെങ്കില്‍ പുകച്ചില്‍
• വെളുത്ത കട്ടിയുള്ള യോനി ഡിസ്ചാര്‍ജ് (സ്ത്രീകള്‍ക്ക്)
• ജനനേന്ദ്രിയ ഭാഗത്തിന് ചുറ്റും ചുവപ്പും ചൊറിച്ചിലും
• മൂത്രമൊഴിക്കുമ്പോഴുണ്ടാകുന്ന പുകച്ചില്‍
• ചികിത്സിച്ചിട്ടും ആവര്‍ത്തിച്ചുള്ള അണുബാധകള്‍
• ഇടയ്ക്കിടെ മൂത്രമൊഴിക്കല്‍, അമിത ദാഹം, അല്ലെങ്കില്‍ വിശദീകരിക്കാത്ത ശരീരഭാരം കുറയല്‍ തുടങ്ങിയ പ്രമേഹ ലക്ഷണങ്ങള്‍.

ഈ ലക്ഷണങ്ങള്‍ ഒരുമിച്ച് അനുഭവപ്പെടുകയാണെങ്കില്‍ പ്രമേഹ പരിശോധന നടത്തേണ്ടത് വളരെ പ്രധാനമാണ്.

പോംവഴികള്‍ എന്തൊക്കെയാണ്

• രക്തത്തിലെ പഞ്ചസാരയുടെ അളവ് ക്രമീകരിച്ച് നിലനിര്‍ത്തുക
• പ്രമേഹത്തിന് അനുയോജ്യമായ ഭക്ഷണക്രമം പിന്തുടരുക, പതിവായി വ്യായാമം ചെയ്യുക, ഡോക്ടര്‍മാര്‍ നിര്‍ദ്ദേശിച്ച മരുന്നുകള്‍ കഴിക്കുക.
• ആന്റിഫംഗല്‍ ചികിത്സകള്‍ നടത്താം. ആന്റിഫംഗല്‍ ക്രീമുകള്‍, ഓറല്‍ മരുന്നുകള്‍ അല്ലെങ്കില്‍ ഡപ്പോസിറ്ററികള്‍ എന്നിവ അണുബാധ ഇല്ലാതാക്കാന്‍ സഹായിക്കും. ഇതിനെക്കുറിച്ച് ചികിത്സിക്കുന്ന ഡോക്ടര്‍ക്ക് പറഞ്ഞുതരാന്‍ സാധിക്കും.
• നല്ല ശുചിത്വം പാലിക്കുക: ജനനേന്ദ്രിയഭാഗം വൃത്തിയുള്ളതായി സൂക്ഷിക്കുക. അയഞ്ഞ കോട്ടണ്‍ അടിവസ്ത്രങ്ങള്‍ ധരിക്കുക. വീര്യമുള്ള സോപ്പുകളോ സുഗന്ധമുള്ള ഉല്‍പ്പന്നങ്ങളോ ഒഴിവാക്കുക.
• പഞ്ചസാരയുടെ അളവ് പരിമിതപ്പെടുത്തുക. ശുദ്ധീകരിച്ച പഞ്ചസാരയും കാര്‍ബോഹൈഡ്രേറ്റും കുറഞ്ഞ ഭക്ഷണക്രമവും യീസ്റ്റ് വളര്‍ച്ച കുറയ്ക്കാന്‍ സഹായിക്കും.
• ധാരാളം വെള്ളം കുടിക്കുന്നത് അധിക ഗ്ലൂക്കോസ് പുറന്തള്ളാന്‍ സഹായിക്കുന്നു.

ലക്ഷണങ്ങള്‍ കണ്ടാല്‍ ശരിയായ രോഗനിര്‍ണയത്തിനും ചികിത്സക്കുമായി ഒരു ഡോക്ടറെ സമീപിക്കേണ്ടത് അത്യാവശ്യമാണ്.

Content Highlights :There is a symptom of diabetes that many people don't discuss. This symptom can also be a sign of type 2 diabetes